Пасяджэнне кансультатыўнага савета дазволіла абмеркаваць далейшую рэалізацыю чарговага праекта міжнароднай тэхнічнай дапамогі.
У Міжнародным навучальным цэнтры падрыхтоўкі, павышэння кваліфікацыі і перападрыхтоўкі кадраў у сферы міграцыі і процідзеяння гандлю людзьмі 15 лютага 2018 года адбылося першае пасяджэнне кансультатыўнага савета па рэалізацыі сумесна з Міжнароднай арганізацыяй па міграцыі праекта міжнароднай тэхнічнай дапамогі «Умацаванне ў Рэспубліцы Беларусь нацыянальнага механізму перанакіравання пацярпелых ад гандлю людзьмі». Мерапрыемства адкрыў кіраўнік прадстаўніцтва МАМ у Беларусі Зейнал Гаджыеў, які распавёў аб асноўных выніках супрацоўніцтва і напрамках далейшага развіцця ў рамках рэалізацыі ў 2017-2020 гадах новага праекту МТД. Каардынацыю і кантроль за рэалізацыяй праекта забяспечвае Міністэрства ўнутраных спраў - нацыянальным каардынатарам праекта з'яўляецца начальнік галоўнага ўпраўлення па наркакантролі і супрацьдзеянні гандлю людзьмі крымінальнай міліцыі палкоўнік міліцыі Генадзь Казакевіч.
На пасяджэнні кансультатыўнага савета акцэнт зроблены на значнасці сумеснай работы беларускіх ведамстваў, міжнародных арганізацый і грамадскіх аб'яднанняў - невыпадкова ў Міжнародным навучальным цэнтры сабраліся прадстаўнікі Вярхоўнага суда, Міністэрства інфармацыі, Генеральнай пракуратуры, Міністэрства працы і сацыяльнай абароны, Міністэрства эканомікі, Дзяржаўнага пагранічнага камітэта, Міністэрства замежных спраў, Міністэрства аховы здароўя, Мінскага гарадскога і абласных выканаўчых камітэтаў і шэрагу грамадскіх аб'яднанняў, у тым ліку Беларускага таварыства чырвонага крыжа, «Дзеці - не дзеля гвалту», «Гендарныя перспектывы» (праграма «Ла Страда Беларусь") і інш. З боку МУС у пасяджэнні бралі ўдзел кіраўніцтва ўпраўлення па наркакантролі і супрацьдзеянні гандлю людзьмі, а таксама прадстаўнікі Дэпартамента па грамадзянстве і міграцыі, упраўлення міжнароднага супрацоўніцтва, упраўлення інфармацыі і грамадскіх сувязяў.
Удзельнікі пасяджэння разгледзелі вынікі рэалізацыі ў 2013-2017 гадах праекта МТД «Умацаванне нацыянальнага патэнцыялу Рэспублікі Беларусь у сферы процідзеяння гандлю людзьмі» і знаёміліся з асаблівасцямі чарговага праекта: мэтай сумеснай працы стала кансалідацыя намаганняў у сферы прадухілення і спынення гандлю людзьмі, а таксама забеспячэнне абароны пацярпелых беларускіх грамадзян і мінімізацыя сацыяльных наступстваў для ахвяр сучаснага гандлю рабамі. Запланаваныя мерапрыемствы міжнароднага і рэгіянальнага характару будуць садзейнічаць умацаванню шматбаковага супрацоўніцтва ў сферы барацьбы са злачыннасцю, а таксама дазволяць у чарговы раз прыцягнуць увагу грамадскасці да праблемы гандлю людзьмі.